ROXAS CITY – Nakahunong na sa karsel sang Roxas City Police Station ang kaupod sang ginbansagan nga FOREX multimillion-peso scam queen sa probinsiya sang Capiz.
Ginkilala ang naaresto nga si Gerlinski Bravo, 42 anyos sang Barangay 11, Roxas City nga kaupod sang una na naaresto nga si Lourdes Baarde.
Si Bravo ang ginakabig nga Number 9 Most Wanted Person sa siyudad sang Roxas nga ginserbihan sang warrant of arrest sang mga katapo sang Roxas City Police Station, Criminal Investigation and Detection Group (CIDG), 602nd Maritime Police kag Provincial Mobile Force Company.
Mahibaluan nga si Bravo ang nagapangatubang sa kaso nga 3 counts of Syndicated Estafa kag wala sang ginrekomendar nga piyansa ang korte.
Matandaan nga mas o menus 50 ka mga indibidwal ang nabiktima sa nasambit nga investment scam kun sa diin nataban sang mga suspek ang minilyon nga investments gikan sa mga investors.
