ROXAS CITY – Ginkumpirmar sang hepe sang Maintenance and Construction Division sang Department of Public Works and Highways (DPWH) Capiz 1st Engineering District nga posible magasugod na sa bulan sang Marso ang konstruksyon sang Roxas City Airport road gikan sa San Roque Street padulong sa Arnaldo Boulevard, Barangay Baybay, Roxas City.
Ini ang ginpahayag ni Engineer Julius Abela sang ma-interview sang Bombo Radyo Roxas.
Suno kay Abela nga katuyu-an sang proyekto nga mapahagan-hagan ang kagutok sang trapiko sa Arnaldo Boulevard ilabi na nga may magabukas diri nga isa ka dako nga mall sa bulan sang Nobyembre.
Mahibaluan nga ang nasambit nga proyekto ang ginpainan sang pondo nga nagalab-ot sa kapin P40 milyones.
Aminado si Abela nga may pila ka mga balay nga maapektuhan sa amo nga proyekto kag suno diri nga nagpasugot naman ang tag-iya sang amo nga mga pamalay nga suguran ang konstruksiyon sini apisar wala pa sila mabayaran.
May pila naman ka mga residente sa Sitio Sto. Niño, Barangay Baybay, sining syudad nga maapektuhan nga kinahanglan nga mare-locate.
Suportado naman ni Roxas City Mayor Ronnie Dadivas ang nasambit nga proyekto kag nagpabutyag sang iya kahandaan sa pagbulig pananglitan may mangin problema sa pagsugod sini.
