ROXAS CITY – Ginahulat pa sang pamunuan sang Roxas City Police Station ang mangin desisyon sang national Inter-Agency Task Force (IATF) natuhoy sa pagpapauli sa Koreano nga illegal recruiter nga nadakpan sa Olongapo City para maaresto ini sa iya nga court of origin.
Ini ang ginpahayag ni Police Master Sergeant Ramil Arcangeles sang mainterview sang Bombo Radyo.
Suno kay Arcangeles nga magahulat lamang sila sa mangin desisyon kun paano papulion sa Capiz ang naaresto nga si Kim Tae-hyoung.
Mahibaluan nga naaresto si Kim sang sa ginkasa nga entrapment operation sang Olongapo kag Zambales – Criminal and Investigation Detection Group (CIDG) Field Units, 301st MARPSTA kag Castillejos Municipal Police.
Ginapahayag nga madugay na ini nga ginaayam sang mga otoridad ang nasambit nga Koreano bangud sa mga reklamo batuk sa iya sang mga indibidwal nga nagapangita sang trabaho nga nakatapos sa Korean language school sa banwa sang Castillejos sa Zambales.
Si Kim ang yara man sa likod sang illegal recruitment sa probinsiya sang Capiz sadtong nakaligad nga tuig kun sa diin nagalab-ot sa masobra 260 ka mga indibidwal ang iya nga nabiktima kaupod ang anay nobya nga Capizeña nga si Ramilyn Andrade.
Natigayon nga mapasakaan sang kaso si Kim matapos nagdangop sa gobyerno-probinsiyal sang Capiz ang mga nabiktima sini.
