PONTEVEDRA, CAPIZ- Yara na sa kapin walo ka tuig nga naga-operate ang KTV bar nga ginsalakay sang mga otoridad sa Barangay Poblacion Ilawod, Pontevedra, Capiz.
Sa interview sang Bombo Radyo kay Punong Barangay Dominador Burata sang nasambit nga lugar, iya ginpahayag nga indi mga taga Pontevedra ang nagatrabaho nga mga kababayenhan sa amo nga bar kag ginapahayag nga nagikan pa ini sa Cebu.
Dugang pa niya, wala naman suno sang gamo nga ginatuga ang amo nga bar magluwas sa ila sini nga tulunggon nga kun kaisa tam-an ka dako sang volume nga nagaresulta sa pagkaistorbo sang mga kaiping sini ilabi na sa oras sang pagpahuway.
Nahibaluan nga pamaagi sa gintingub nga pwersa sang Women and Children Protection Center- Visayas Field Unit (WCPC- VFU) ang nasambit nga operasyon kaupod ang Police Regional Office 6, Regional Women and Children Protection Desk kag iban pa nga natungdan nga ahensya sang gobyerno natigayon nga na-rescue ang pito ka mga kababayenhan nga naga-trabaho diri.
Samtang, padayon naman suno diri ang pagbantay sang mga tanod para sa pagpabilin sang kalinong kag katawhay sa amo nga barangay.
Interviewed by Bombo Francis Biñas
