“Kun wala sang may ma-claim sa iya ako ang maatipan kay anghel ina”, ini ang mga ginbuy-an nga tinaga kag pagpasalig ni Retired PMaj. Lorimo Buhat, matapos makit-an mismo sa ila compound ang bag-o bun-ag nga lapsag kag ginbayaan sang wala pa matumod nga ginikanan.
Sa interview sang Bombo Radyo kay Buhat, ginsiling sini nga posible indi babaye ang nagkadto sa ila lugar kundi lalaki bangud mataas ang pader sang ila puluy-an.
Mahibaluan nga ginkakibot sang pumuluyo sa Barangay Libas sang makit-an ang lapsag nga yara sa kanal, may inunlan pa kag wala nautod ang pusod.
Pahayag pa sini nga indi malayo nga taga-Libas ang nagbilin sa amu nga lapsag bangud suno diri nga ang pangabuhi sa sa ila lugar malaka lamang ang may ikasarang sa kabuhi.
Para sa retiro nga opisyal, ini lamang siguro suno diri ang napinsaran nga himuon sang ginikanan sang lapsag.
Matandaan nga sang gab-i antes ini natabo takna alas 9:00 naguha siya agud magpanigarilyo may nabatian na ini nga nagahebi nga lapsag apang sa iya sini nga pag-flashlight wala siya sang may nakita kag naga-untat-untat ang hebi.
