Arestado sang mga otoridad ang isa ka lalaki matapos nga naaktuhan nga nagadala sang iligal nga armas-luthang sa Barangay Sinamongan, Pilar, Capiz.
Ang arestado amo si alyas “Romel”, 52-anyos, kag residente sang Sitio Brilliantehan, Barangay Sinamongan, Pilar Capiz.
Sa interview sang Bombo Radyo kay PSMS ELMER T BALGOS JR., imbestigador sang Pilar Municipal Police Station, ginpahayag niya nga una nagkadto sa estasyon sanday Barangay Kagawad Nida Dela Cruz y Soriano, 69-anyos kag Kagawad Efren Bornales y Perez, 53-anyos upod ang asawa kag bata sang suspek nga sanday Michelle Bacli y Villanes kag Juspher Bacli y Villanes, kag ginreport nila nga may bitbit nga iligal nga armas luthang si alyas “Romel”.
Gilayon naman nga nagresponde ang katapo sang kapulisan sa pagpanguna ni PMAJ Rachelle D. Garnica, ACOP sang Pilar PNP kag pag-abot sa lugar ila naaktuhan ang arestado nga may uyat nga armas-luthang.
Dugang pa nga nakumpiskar sa amo nga arestado ang isa (1) ka homemade pistolized break-type 12-gauge shotgun kag duha (2) ka live shot shells sang 12-gauge shotgun. Wala naman sang may mapakita nga nagakaigo nga dokumento si Bacli para sa nasambit nga armas-luthang.
Magapangatubang sa kaso nga paglapas sa RA 10591 ukon Comprehensive Firearms and Ammunition Regulation Act ang amo nga arestado.
Sa karon, yara na ini sa kustodiya sang Pilar Municipal Police Station para nagakaigo nga disposisyon.
