Arestado ang isa ka lalaki matapos ginserbihan sang arrest warrant may kaangtanan sa kaso nga Grave Oral Defamation suno sa Article 358 sang Revised Penal Code nga gin-amendahan paagi sa Section 94 sang Republic Act 10951.
Ang arestado amo si alyas “Zal,” 62-anyos, residente sang Barangay Maninang, Sapian, Capiz.
Sa interview sang Bombo Radyo kay Police Liutenant Steve Ian Bautista, Officer in-charge sang Sapian Municipal Police Station, iya ginpahayag nga natigayon ang pag-aresto sang suspetsado base sa warrant nga gin-issue kag ginpirmahan ni Hon. Joevy Valenzuela, Presiding Judge sang Municipal Circuit Trial Court, 6th Judicial Region sa Sigma, Capiz.
Suno kay Bautista, ang amo nga kaso ang may bail bond recommended nga P18,000.00.
Sa subong, yara na sa kustodiya sang Sapian Municipal Police Station ang arestado para sa nagakaigo nga disposisyon.
