Dakop sa akto ang isa ka ginapahayag kawatan nga lalaki matapos nga ini ang tuyo kun tani nga mangbiktima liwat sa bahin sang Teodoro Arcenas Trade Center ukon TATC subong lang nga aga.
Ginkilala ang biktima kay alyas “Liezel” 58-anyos residente sang syudad sang Roxas samtang ang ginatumod nga suspek ang ginkilala kay Rey Bosico Blasurca, 50- anyos kag residente sang Barangay Bonga, Panay, Capiz.
Sa nakuha nga impormasyon sang Bombo Radyo base sa panaysayon sang biktima, ginpahayag nga ginbilin sini ang iya nga pinamaklan sa ila nga tricycle bangud may yara pa sini sang baklon sa sulod sang nasambit nga merkado.
Sa iya nga pagbalik, naaktuhan nalang sini si Rey nga ginabukad na ang iya pinamaklan kag tuyo na kun tani nga tabanon.
Didto na kag nagsinggit ini sang “makawat” kag gilayon naman nga gin respondihan sang pila ka mga auxiliary guard nga nakaduty sa lugar.
Mahibaluan nga ang amo nga persona ang ginakabig na nga gabunan nga kawatan kag masami ini nga nagapangbiktima sa TATC.
Matandaan nga kahapon nga adlaw, ginkawatan man sini ang tag-iya sang Karne, nga si Nilo Delos Santos, sa nasambit nga merkado.
Dugang pa ni alyas Liezel nga wala sini ginalauman nga mahitabo ini sa iya bangud indi ini ang una nga bes nga nagpamakal sa TATC kag ginabilin ang iya pinamaklan sa tricycle.
Sa karon, yara na ini sa paghinakop sang Roxas City Police Station ang nasambit nga suspek para sa nagakaigo nga disposisyon.
