PRESIDENT ROXAS, CAPIZ – Madugay na nga gina-monitor sang kapulisan ang lalaki nga nabaklan sang armas kag nakuhaan sang iligal nga droga sa Brgy. Poblacion, Pres. Roxas, Capiz.
Ini ang ginpahayag ni PMAJ. Rachelle D. Garnica, Hepe sang President Roxas Municipal Police Station sang ma-interview sang Bombo Radyo.
Matandaan nga ginkilala ang nadakpan kay alyas Toto, 50-anyos nga residente sang nasambit nga lugar. Nabaklan ini sang isa ka unit sang caliber .38 revolver sa balor nga P2,500.
Narekober pa sa posisyon sini ang tatlo ka sachets sang suspected shabu nga ginabanta nagabug-at sang apat ka gramos kag may standard drug price nga P27,200 kag isa ka sachet sang suspected marijuana nga ginabanta nagabug-at sang isa ka gramo kag nagabalor sang P1,000.
Magapangatubang ang arestado sang kaso nga paglapas sa R.A 10591 ukon Comprehensive Law on Firearms and Ammunitions Regulation Act kag R.A 9165 ukon Comprehensive Dangerous Drugs Act of 2002.
Sa karon nagapabilin sa kustodiya sang Pres. Roxas PNP ang nasambit nga arestado.
