Napasakaan na sang kaso ang lalaki nga nadakpan sa ginpatigayon nga buybust operation sang mga katapo sang kapulisan sa Water Village, Barangay Lawaan, Roxas City.
Matandaan nga ginkilala ang nadakpan kay alyas “Jay-R” 36-anyos kag residente sang Barangay Milibili sining syudad.
Sa interview sang Bombo Radyo kay PLTCOL Lumyaen Lidawan, Officer-in-Charge sang Roxas City PNP, ginpahayag sini nga napasakaan na sang lima ka kaso si alyas “Jay-R” nga ginakalakipan sang violation of RA 10591 ukon “Comprehensive Firearms and Ammunition Regulation Act”, RA 9516 ukon “Illegal Possession of Explosives”, violation sa Batas Pambansa Blg. 881 may kaangtanan sa Resolution No. 11068 ukon ang “Comelec Gun Ban” kag Comelec Ban on Explosives as Deadly Weapon.
Dugang pa sini, madugay na nila nga gina-monitor si “Jay-R” bangud ginapahayag nga ulamid man ini sa pagpangawat sang mga manok nga pambulang indi lamang diri sa syudad sang Roxas kundi mangin sa bilog nga probinsya kag iban pa nga lugar sa probinsya man sang Iloilo.
Nadakpan si Jay R pinaagi sa isa ka pulis nga nagpakuno-kuno poser buyer kun sa diin nakuha sa paghinakop sini ang isa ka unit sang homemade caliber 38 revolver nga wala sang serial number, 3 ka mga bala, 1 ka hand grenade kag buybust money nga balor P3,600.00.
Sa karon, nagapabilin ini sa kustodiya sang Roxas City PNP para sa nagakaigo nga disposisyon.
