Dakop sa akto ang isa ka lalaki nga nagapangawat sang bugas sa isa ka tindahan sa Datiles Street, Barangay Tiza syudad sang Roxas.
Ginkilala ang suspek kay alyas Rey, 49-anyos kag residente sang Barangay Bonga, Panay, Capiz.
Sa nakuha nga impormasyon sang Bombo Radyo sa Roxas City Police Station, base sa nangin pahayag sang tag-iya sang amo nga tindahan nga gikilala nga si Rutchelle, 34-anyos nga samtang ginapakat ini sang atendir sang mga nagabakal, hinali nalang nga ginpas-an ni Rey ang isa ka sako nga bugas nga iya ginabaligya.
Gilayon naman ini nga nadakpan matapos ini nga ginlagas sang iya bana kag gin-turnover sa mga kapulisan.
Sa karon, nagapabilin ang nasambit nga suspek sa kustodiya sang Roxas City Police Station para sa nagakaigo nga disposisyon.
