Himala nga nasapwan nga may kabuhi pa sa iya nga higdaan ang isa ka 64-anyos nga lalaki sa Ancona, Italy, duha ka adlaw matapos sini nga naigo ang kaugalingon sa ulo gamit ang isa ka crossbow.
Ang wala na ginhingadlan nga lalaki ang isa ka kilala nga crossbow enthusiast, nasapwan sang mga pulis sa iya nga balay matapos nagpanawag ang isa ka nagakabalaka nga himata sini. Sang puwersahan nga ginbuksan ang pirtahan, nakita nila ang lalaki nga may nakatusok nga crossbow bolt sa iya nga agtang.
Gilayon ini nga ginpadangat sa ospital, kun sa diin ginsiling sang mga doktor nga may alinto kag naga-istorya pa ini, apang indi na maintyendihan ang iya sini ginapangmitlang.
Suno kay Dr. Maurizio Iacoangeli, chief sang Neurosurgery sa Torrette hospital kun sa diin gindala ang lalaki, iya ginpahayag nga maswerte ang amo nga lalaki bangud nga nag-agi ang pana sa iya nga agtang tubtob sa batok apang sa gihapon buhi pa. Kag ini suno sa iya ang una nga kahigayunan nga iya na-encounter.
Maayo na lang gid kag human sa karbon ang pana kag indi sa metal, rason nga nahimo sang mga doktor nga magpatigayon sang CT scan sa pasyente. Bangud sini, naekasmin man sang mga doktor ang insakto ngz posisyon sang pana kag nangin madinalag-on ang operasyon. Gin-athag ni Dr. Iacoangeli nga ang pagtanggal sa pana ang nangin maselan bangud mahimo ini nga magtuga sang tuman nga pagdugo.
Gingamit sa operasyon ang mga technique nga natun-an niya nagikan sa isa ka neurosurgeon sang U.S. Army nga may eksperyensya sa mga sitwasyon nga pang-gyera.
Apisar nangin madinalag-on ang operasyon, nagapabilin nga seryoso ang kondisyon sang pasyente. Gina-mbestigaran pa sang mga otoridad kun ang insidente isa ka aksidente uko isa ka katuyuan sang suicide apisar nga wala man ini sang history sang metal illness ang amo nga lalaki.
