ROXAS CITY – Ginapadalman pa sang mga katapo sang Tapaz Municipal Police Station ang ila nga imbestigasyon natuhoy sa nagluntad nga pagpanglabo-patay sa isa ka lalaki sa Barangay Artuz, Tapaz, Capiz.
Nag-angkon sang tatlo ka labo sa liog ang biktima nga ginkilala kay Mike Galagate.
Una na nga ginpahayag ni Police Captain Bryant Fallera, hepe sang Tapaz Municipal Police Station, may tatlo na sila ka persons of interest nga makahatag sang kasanagan sa kamatayon sang biktima.
Ba-se sa inisyal nga imbestigasyon sang kapulisan, nagaguwa nga antes nasapwan ang bangkay ni Galagate nga nagapaligo na sa kaugalingon nga dugo sa iya balay, nag-inum pa ini kaupod ang duha ka mga indibidwal.
Suno sa opisyal nga gintuad sang katapusan nga nakaupod sang biktima sa pag-inum nga nagpauli sila kag ginbilin si Galagate nga nagakanta pa gamit ang iya nga mini sound.
Ginapatihan nga natulugan na ang biktima sang ini ang lab-on sa liog.
Indi pa sa karon ma-establisar ang motibo sa krimen bangud padayon pa ang imbestigasyon sa krimen.
PHOTO FROM WEB
