ROXAS CITY – Patay ang 33 anyos nga lalaki matapos ginluthang sa sulod sang ila nga ugsaran sa Barangay Yatingan, Pontevedra, Capiz.
Ginkilala ang napatay nga biktima nga si Jaicar Beldia, residente sang nasambit man nga lugar.
Ba-se sa inisyal nga imbestigasyon sang mga kapulisan, samtang nagapahuway ang biktima sa bangko sa terrace sang ila nga balay, hinali lamang ini nga ginluthang sang wala pa nakilan-an nga suspek gamit ang 9mm. caliber pistol sang makaapat ka beses.
Suno sa amay sang biktima nga si Romulo Beldia, posible nag-agi ang suspek sa likod nga porsyon sang ila nga gate.
Nakibot na lamang ini sang nakabati sang asud-asod nga lupok kag didto nakit-an ang anak nga duguon.
Gindala pa sa Bailan District Hospital ang biktima apang gindeklarar nga dead-on-arrival sang attending physician.
Madasig naman nga nakapalagyo ang suspek nga nagtiro sa biktima matapos nagsakay sa motorsiklo nga nagaduag itom nga nagahulat sa gate sang balay.
