Pilas sa ulo kag magkatuhay nga parte sang lawas ang naangkon sang isa ka lalaki matapos nga ginbuno sang iya pakaisa sa Barangay Pangabwan, banwa sang Jamindan.
Ginkilala ang biktima kay alyas Roland 24-anyos residente sang Brgy. Ganzon sa nasambit nga banwa, samtang ang ginapahayag suspek amo si Alyas Ricky,33 anyos ,residente sang Brgy. Pangabwan sa kapareho nga banwa.
Sa impormasyon nga nakuha sang Bombo Radyo nagikan sa Jamindan Municipal Police Station, ginpahayag nga samtang nagakatulog ang biktima kaupod ang utod sini sa balay mismo sang suspek, hinali nalang nga nagsulod ang suspek sa kwarto kun sa diin nagakatulog ang biktima kag gulpi nalang ginbuno sang suspetsado gamit ang isa ka hinganiban.
Bangud sini, nag-angkon sang pilas sa ulo kag magkatuhay nga parte sang lawas ang biktima kag nakadalagan pa ini sa mga kalapit balay para makapangayo sang bulig.
Madasig naman nga nagpalagyo sa lugar ang suspek matapos makumiter ang krimen.
Gilayon naman nga gindala sa Mambusao District Hospital ang biktima para sa nagakaigo nga pagbulong.
Samtang, daan nga hiligut-anon ang ginalantaw nga motibo sang kapulisan sa natabo nga krimen.
Sa karun, padayon nga nagapatigayon sang hot pursuit operation ang mga kapulisan batuk sa nasambit nga suspetsado.
