ROXAS CITY – Pilason ang isa ka lalaki matapos ginbuno sang iya kaugalingon nga manghod sa Brgy. Agkilo, Panitan, Capiz.
Ginkilala ang biktima kay alyas Rob, 46-anyos, isa ka mangunguma samtang ang suspetsado ang ginkilala kay alyas Mike, 34-anyos kag lunsay mga residente sang nasambit nga lugar.
Base sa impormasyon nga nakuha sang Bombo Radyo News Team nagikan sa Panit-an Municipal Police Station, ginapahayag nga pagpauli sang suspetsado sa ila puluy-an, ginkomprontar ini sang iya magulang nga si Rob kag didto na nag-umpisa ang pagbinaisay sa tunga sang biktima kag sang suspek. Bangud sini hinali nalang ginbuno sang suspetsado ang biktima sa tiyan gamit ang isa ka kutsilyo.
Gilayon nga ginpadangat sang iya mga himata ang biktima sa Bailan District Hospital para sa nagakaigo nga pagbulong.
Samtang, boluntaryo naman nga nagsungka ang suspetsado sa mga kapulisan matapos nakumiter ang krimen.
Sa karon, yara na sa kustodiya sang Panit-an PNP ang nasambit nga suspetsado para sa nagakaigo nga disposisyon.
