ROXAS CITY – Pilason ang isa lalaki matapos ginlabo sang iya kaingod balay gamit ang espading sa Barangay Tanque, Roxas City.
Ginkilala ang biktima kay alyas “Bernie”, 37-anyos kag ang ginatudlo suspek ang ginkilala alyas “Jonel” 30-anyos lunsay mga residente sang nasambit nga lugar.
Sandig sa impormasyon nga nagikan sa Roxas City Police Station, nahibaluan nga yara sa impluwensya sang mkahulubog nga ilimnon ang biktima kag suspek sang may nagluntad nga pagbinaisay sa tunga sang magtimbang nga bahin nga nagresulta sang indi manami nga istoryahanay.
Gilayon nga nagpauli ang suspek sa iya sini nga puloy-an apang pagbalik sini may dala na nga espading kag hinali lamanng nga ginlabo ang biktima.
Bangud sini, nag-angkon sang pilas sa magkatuhay nga parte sang iya lawas ang biktima sa pagpanglabo kun sa diin insigida naman nga gindala sa pinaka malapit nga Hospital agud mapadapatan sang nagakaigo nga pagbulong.
Gilayon naman nga nagresponde ang katapo sang barangay kag naaresto ang suspek kag ginturn-over sa kaPulisan.
Sa karon, nagapabilin ini sa kustodiya sang Roxas City Police Station ang suspek para sa nagakaigo nga disposisyon.
