Nagpahanumdom ang isaka legal expert sa pagsunod sang tama nga proseso sa pag-register kag pagtransfer sang ownership sang real property.
Sa interview sang Bombo Radyo kay Atty. Louise Abigail Bocala Espiritu sang Integrated Bar of the Philippines- Capiz Chapter, iya ginpahayag nga ang transfer of ownership amo ang legal nga pagbalhin sang titulo sang duta ukon balay halin sa daan nga tag-iya padulong sa bag-o nga magapanag-iya.
Suno kay Espiritu, importante gid nga mabalhin ang titulo bangod ini ang nagapamatuod sang legal nga pagpanag-iya kag nagahatag proteksyon batok sa posible nga mga dispute ukon doble nga claim sa propiedad.
Pahayag pa niya, ang pagrerehistro sang real property may tinutuyo nga ma-record ini sa gobyerno agud mangin opisyal kag kilalahon ang bag-o nga tag-iya.
Lakip sa mga nagapanguna nga tikang sa pag-transfer amo ang pagpreparar sang Deed of Sale, pagbayad sang kinahanglanon nga buwis sa Bureau of Internal Revenue, pagkuha sang tax clearance, kag pagparehistro sang titulo sa Registry of Deeds.
Dugang pa sang natungdan, importante ang kumpleto kag husto nga dokumento sa sini nga proseso bangod ini ang nagalikaw sa legal nga problema sa palaabuton.
