Luyag ni Presidente Ferdinand Marcos Jr nga magbilin sang legasiya sa katapusan sang iya termino nga amo ang makahatag sang daku nga pagbag-o sa kabuhi sang mga Pilipino.
Ini ang sabat sang Presidente sa isa ka pamangkot sa iya podcast interview kun ano nga legasiya ang luyag niya ibilin sa mga Pilipino pagkatapos sang iya anum ka tuig nga termino sa 2028.
Ginpahayag sang Presidente nga wala na siya sang iban nga handom kundi ang makahimo sang dako nga pagbag-o para sa kaayuhan sang tagsa ka Pilipino kag ini ang nangin handum niya sa tanan nga posisyon nga iya na-uyatan sa gobyerno.
Ginsiling sini nga ang pinakamalain nga matabo amo ang magpungko bilang Presidente apang wala sang may ginahimo kag wala sang may naamot sa kabuhi sang mga Pilipino.
Gani suno sa iya, siguraduhon sang Presidente nga sa tuig 2028, sa paghalin niya sa pwesto, may yara sang importante kag konkreto nga mga pagbag-o para sa mas maayo nga pangabuhi sang tagsa ka Pilipino.
