Dalayon na nga mangin isa ka layi ang libre nga entrance examination sang mga kuwalipikado nga estudyante sa mga pribado nga higher educational institutions (HEIs) matapos ini nga mag-“lapse into law”.
Ang Republic Act No. 12006 ukon ‘Free College Entrance Examination Act’ ang ginaduso ni Senator Ramon “Bong” Revilla Jr. nga pamag-anon ang kahigayunan agud malambot ang dekalidad nga edukasyon sa kolehiyo sang mga kubos apang maalam nga mga estudyante kag indi na sila pagsukton sa entrance examination fees kag charges para sa college admission.
Sa idalum sang nasambiit nga layi, tanan nga private HEIs ang ginamanduan nga indi na pagsukton sang fees kag charges nga ginasukot sa graduates kag graduating student nga naga-aplay para sa college admission basta kuwalipikado ang mga ini.
Agud mangin kwalipikado, kinahanglan nga natural-born Filipino citizen; nagikan sa top 10% sang graduating class; nagikan sa pamilya nga bisan pa isimpon ang kita indi sa gihapon bastante kag indi lagpas sa poverty threshold ukon wala sang kaya nga mahatagan sang bastante nga kinahanglanon ang pang adlaw-adlaw: kag kinahanglan nga mga-aplay sa college entrance examination sang pribado nga HEI sa pungsod kag siguradohon nga kumpleto ang iban pa nga requirements sang mga pribado nga HEI.
