CAPIZ-Nagpatigayon liwat ang Gobyerno Probinsyal sang Capiz sang Gugma Medical and Dental Mission sa Brgy. Lawaan Covered Gym, Roxas City, subong nga adlaw, Oktubre 9, 2026, agud mahatagan sang libre nga serbisyong panglawas ang mga pumuluyo sang Barangay Lawaan, Bolo kag Lanot.
Lakip sa mga serbisyo nga ginhatag ang libre nga medikal kag dental nga konsultasyon, computed tomography (CT) scan, X-ray, electrocardiogram (ECG), complete blood count (CBC), random blood sugar (RBS) test, urinalysis, human immunodeficiency virus (HIV) screening, family planning services, tuberculosis (TB) counseling kag paghatag sang libre nga mga bulong.
Ginpatigayon ang aktibidad sa pagpanguna sang Provincial Health Office (PHO), nga ginapangunahan ni Dr. Alex Nolasco, sa pagbuligay sang lima ka district hospitals sang probinsya. Kabahin ini sang regular nga programa sang Gobyerno Probinsyal agud mapalapit ang mga serbisyong panglawas sa mga komunidad kag mabuligan ang mga pumuluyo nga makapakomunsulta nga indi na kinahanglan magbiyahe sa malayo nga lugar kag maggasto sing daku.
Sa amo man nga aktibidad, ginsaysay ni Governor Fredenil H. Castro ang nagahilapit nga pagbukas sang Capiz Medical Center sa Barangay Lanot, Roxas City, kag ang paggamit sang electronic-Medical Assistance to Indigent and Financially Incapacitated Patients (e-MAIFIP), nga nagahatag sang pamaagi para makapangayo sang bulig pinansyal ang mga kwalipikado nga pasyente.
Nagtambong man sa aktibidad si Vice Governor Jaime Magbanua, kaupod ang mga miyembro sang Sangguniang Panlalawigan nga sanday Board Members Ging-ging Almalbis, Trina Marie Ignacio, Cesar Yap kag Junjun Billones. Kaupod man nila ang mga health worker sang lima ka district hospitals, mga barangay health worker (BHW), mga opisyal sang tatlo ka kabarangayan kag iban pa nga mga representante sang probinsyal nga gobyerno.
