ROXAS CITY – May pondo gikan sa gobyerno ang Libre sakay Program sang mga Modernized Public Utility Jeepney’s (MPUJ).
Ginpahayag ni Atty. Richard Osmeña, Regional Director sang Land Transportation Franchising and Regulatory Board ukon LTFRB, may P52.00 per kilometer nga pondo kada MPUJ nga kalakip sa Libre sakay program sang gobyerno sa probinsiya sang Capiz.
May pasahero ukon wala padayon ang pagbiyahe sang mga MPUJs sa gindesignar nga ruta sa ila.
Sigurado nga nabaton na sang natungdan nga mga MPUJs ang ginpa-in nga pondo sa ila kag pamatood diri ang ila na nga pagbiyahe sa palibot sang syudad sang Roxas.
Magadugay ang Libre sakay program sang gobyerno tobtob sa bulan sang Hunyo.
Suno kay Osmeña nagalab-ot sa P5 billion ang gin-alokar nga pondo para sa libre sakay program sang gobyerno sa bilog nga Pilipinas.
Pag-abot naman sa reklamo sang mga tricycle driver nga apektado sa Libre Sakay program, wala sang mahimo si Osmeña bangud ini ang programa sang gobyerno kag sila ang naga-implementar lamang.
Apang ginpasiguro sini nga ila na napalab-ot sa central office ang reklamo sang mga tricycle drivers nga kasubong nadulaan sang palangabuy-anan.
Samtang ginpahayag ni Osmeña nga ginapahanugutan naman sa karon ang 75% sitting capacity sa mga jeepney’s ang importante lamang nga pagasundon ang minimum health protocols agud malikawan ang paglapta sang COVID-19.
