ROXAS CITY – Nangin madinalag-on ang ginpatigayon nga Handog ng Bombo Radyo at Star FM sa mga Capizeño Battle of the Bands and Dance Showdown sa Capiztahan 2019.
Temprano pa lamang nagtililipon na sa Capiz State University main campus covered gym ang linibo ka mga tumalan-aw para saksihan ang performance sang pito ka banda, napulo ka dance groups kag tumalagsahon nga performace sang mga personnel sang Bombo Radyo Roxas.
Gikan sa pito ka banda nga nagpasakop sa battle of the band nagkampeon ang grupo nga Cytoplasm, 1st runner-up ang Calixas kag 2nd runner-up ang Chazikami.
Nakuha man sang vocalist nga si Edera Lopez sang Calixas band ang special award bilang Best Vocalist of the Year.
Sa exclusive interview ng Bombo Radyo Roxas kay Lopez, ginpahayag sini nga wala niya ginalaoman nga siya ang mahatagan sang nasambit nga award.
Suno pa diri nga madugay naman siya nga vocalista kag madamo naman ini sang ginpasakopan nga mga national competition.
Samtang nagkampeon ang dance group nga PRF Kids Iloilo sa Dance Showdown, 1st runner-up ang One Crew kag 2nd runner-up naman ang King of Motion.
Matandaan ang defending champion sang nagligad nga tuig ang One Crew apang nalutos ini sang PRF Kids Iloilo subong nga tuig.
Nakabaton sang P11,000 nga cash kag trophy ang Cytoplasm band nga nagkampeon sa Battle of the Bands, kag sa dance showdown P11,000 kag trophy naman ang nabaton sang PRF Kids Iloilo nga nagkampeon sa nasambit nga kumpetisyon
Samtang P7,000 ang nabaton nga premyo sang 1st runner-up kag P5,000 sa 2nd runner-up kag sa iban nga grupo nga wala naman nakasulod sa Top 3 may nabaton man sila nga consolation prizes.
