Natalana nga ipatawag buwas nga adlaw sang Biyernes sang konseho sang Barangay Libas, sining syudad si Maritess, lola sang menor de edad nga mga bata nga ginaalegar ginasakit sini.
Katuyuan sang mga opisyales sang Barangay Libas sa pagpatawag kay Maritess, agud maestorya ang nasambit nga ginang angut sa mga akusasyon sang pagpamintas sini sa mga menor de edad nga apo nga anak sang iya gin-adoptar nga si Zaldy.
Aminado ang ginang nga nasakit sini ang mga bata, apang iya depensa nga nahimo lamang niya ini bangud sa makulit sila kag nag-alegar pa nga nagapangkuha ini sang iya kuwarta.
Sa pagpakig-estorya sang Bombo Radyo sa mga kabataan nga naga-edad sang apat kag tatlo ka tuig, ila gintuad nga ginapadapatan gid man sila sang kamot sang ila lola Maritess.
Ginpakita pa sang mga bata ang inagihan sang pagsakit sa ila sang lola.
Apang gilayon nga nagahipos kun tulukon sila sang lola, nga klaro nga senyales nga indi sini luyag nga magbuhi sila sang dugang nga tinaga.
Sa bahin naman sang adoptibo ni Maritess nga si Zaldy, amay sang tatlo ka mga kabataan, ginpahayag sini nga makaisa lamang sa isa ka semana ini kun makapauli sa ila balay bangud sa iya trabaho.
Apang may bes man sadto nga nakita sini ang pagsakit sa iya anak sang ginakilala nga iloy, apang wala sang mahimo bangud nagalumon lamang sila nga mag-asawa
Matandaan nga isa ka concerned neighbor sang pamilya ang personal nga nagpadulong sa Bombo Radyo nga nagahilibion nga ginsugid ang iya nasaksihan nga pagsakit sa mga menor de edad kag paglu-ok sa pito ka bulan nga lapsag.
