Mahimo bawi-on sang Land Transportation Office (LTO) ang lisensya sang mga motorista nga mapamatud-an nga nagbutang sa peligro sa mga pedestrian.
Ini kasunod sang ginpagwa nga Memorandum No. MVL-2026-229, nga nagahatag sang mas klaro nga proseso sa pagdokumento kag pag-imbestigar sang mga insidente nga nagalakip sang mga pedestrian.
Sa idalom sang memorandum, mahimo ideklarar nga “Improper Person to Operate a Motor Vehicle” ang isa ka motorista suno sa Republic Act No. 4136 ukon Land Transportation and Traffic Code.
Mahimo ini mangin basehan sa pagbawi sang lisensya, apang kinahanglan gihapon nga magaagi sa nagakaigo nga proseso kag hatagan sang due process ang motorista.
Partikular nga sakop sang polisiya ang mga insidente sa pedestrian lanes ukon designated pedestrian crossings.
Lakip sa ginakabig nga pedestrian ang mga kabataan, senior citizen, persons with disabilities (PWDs), mga nagagamit sang wheelchair, saklay, baston kag iban pa nga mobility devices.
Sakop man sini ang mga tawo nga nagatulod sang stroller ukon kariton, mga pasahero nga bag-o pa lang nagpanaug ukon magasakay pa lang sang salakyan, kag mga traffic enforcer, road worker kag iban pa nga otorisado nga personnel nga nagahimo sang ila katungdanan sa dalan.
Apang ginpaathag sang ahensya nga usisaon gihapon ang tagsa ka insidente base sa bug-os nga kahimtangan, lakip na ang ginahimo sang pedestrian, antes magpatuman sang nagakaigo nga administrative action.
Suno kay LTO Chief Assistant Secretary Markus Lacanilao, ang katuyuan sang sini nga tikang amu ang pagprotektar sa kabuhi kag seguridad sang mga pedestrian kag ang pagpanabat sang mga motorista nga nagabutang sa ila sa peligro.
