SIGMA CAPIZ – Pilason ang lunsay mga senior citizen, matapos maglab-anay sa Barangay Amaga, Sigma Capiz.
Ginkilala ang biktima kay alyas Ely, 64-anyos, samtang ang gintudlo suspek ang ginkilala kay alyas Jun, 67-anyos, lunsay mga laborer kag lunsay residente sang Purok 5, Barangay Acbo sa nasambit nga banwa.
Sa interview sang Bombo Radyo sa hepe sang Sigma Municipal Police Station nga si PCapt. Mark Anthony Garcia, ginpahayag sini nga samtang naga-inum-inum ang biktima kag suspek kaupod ang ila mga abyan may nagluntad nga pagbinaisay kag indi pag-intindihanay sa tunga sang magtimbang nga bahin rason nga hinali nalang nga ginbuno sang suspek ang biktima sa kamot gamit ang butong.
Suno kay Garcia matapos ini, ginpadulungan pa sang suspek ang biktima sa puluy-an sini agud hangkaton ang biktima apang sa pagpalapit sang biktima nga luyag lamang kun tani nga istoryahon ang suspek gulpi na lang ini nga ginlabo kabangdanan nga nagbalos ang biktima sa pagpanglabo.
Bangud sa natabo, nag-angkon sang pilas sa sa magkatuhay nga parte sang lawas ang biktima kag suspek nga gilayon ginpadangat sa Senator Gerardo M. Roxas Memorial Hospital ang biktima samtang ang suspek naman ang ginpadangat sa Mambusao District Hospital apang gin-transfer Roxas Memorial Provincial Hospital agud dapatan ang mga ini sang nagakaigo nga pagbulong.
Nakuha sa lugar ang matalum nga hinganiban nga gingamit sa insidente.
Mensahe sang hepe sa mga pumuluyo nga kun tani sa tion nga naka-inum sang makahulubog nga ilimnon ibutang sa lugar kag indi na magtuga sang mga istorya nga magresulta sang kaangay sini nga butang.
