ROXAS CITY – Ginpanginwala sang alkalde sang Maayon ang alegasyon nga bodyguard sini ang nagpanumbag sa 18-anyos nga lalaki nga nagreklamo sa Roxas City Police Station sadtong nakaligad nga Pebrero 22.
Ini ang ginpahayag ni Maayon Mayor Raymond Malapajo sang ma-interview sang Bombo Radyo Roxas.
Suno kay Malapajo nga kaupod sini ang iya duha ka bodyguard sang ila pagsulod sa Soul Superclub sa Grandville, Arnaldo Boulevard, Barangay Inzo Arnaldo Village, Roxas City.
Ginpahayag ni Malapajo nga antes sila nagsulod saamo nga club ginpangitaan pa sila sang lamesa sang duha ka bouncer bangud indi ini magsulod kun wala sang lamesa.
Ginklaro ni Malapajo nga wala sang komosyon nga natabo bangud nangin matawhay man ang ila nga pagguwa sa amo nga club kag gindul-ong pa sini ang iya nga bisita sa Roxas City Airport.
Ginapanindugan sang alkalde nga wala sini ginatolerar ang batasan sang iya nga body guards kun may yara gid man sang sala nga ginhimo.
Bangud diri, ginahangkat sini ang tagreklamo nga kun mahimo hingadlan sini ang iya nga body guard nga nagsumbag agud matumod kun sin-o ini.
Mahibaluan nga nagsulod lamang si Malapajo sa amo nga club bangud may yara ini sang bisita kag indi na sini luyag nga magpahuway pa antes magpadulong sa airport rason nga nag-upod na lamang siya sa pag-upod sa amo nga club.
Aminado ang alkalde nga apisar wala ma-mensyunar ang iya nga pangalan apang nadalahig ini bangud sa alegasyon sang tagreklamo nga ginsumbag ini sang iya nga body guard.
Ginpabutyag pa sang alkalde nga ginahalungan gid sini ang iya nga pangalan bangud ginadala sini ang banwa sang Maayon kun sa diin man siya magpadulong.
