Naka-red alert ang Poland matapos ang mabaskog nga heatwave nga ginsundan sang mabaskog nga pag-ulan kag mabaskog nga hangin sa pungsod.
Suno kay Bombo Neva Intripido-Kessler, International Correspondent sa Poland, iya ginpahayag nga nabatyagan sang mga pumuluyo ang tuman nga kainit sang nagligad nga mga inadlaw.
Suno sa iya, madamo nga mga pumuluyo ang ginpili nga magtinir sa sulod sang ila mga puluy-an, agud malikawan ang masingkal nga init sang adlaw, ilabi na sa udto.
Nagpaandam man ang mga opisyal nga ang tuman nga kainit mahimo nga makatuga sang heat exhaustion, heat stroke, kag iban pa nga risgo sa ikaayong lawas, partikular sa mga kabataan, mga tigulang, kag sa mga may yara sang mga balatian.
Pahayag pa niya, madasig man nga nagbag-o ang panahon kag nagtuga sang mga thunderstorms sa pila ka bahin sang pungsod.
Dugang pa sang natungdan, padayon nga gina-engganyo sang mga otoridad ang publiko nga sundon ang mga ginpaguwa nga mga advisory, magpabilin nga hydrated, likawan ang indi kinahanglanon nga aktibidad sa guwa sa tion sang tuman nga init, kag mangin handa sa hinali nga mga pagbag-o sang kondisyon sang panahon.
