Nagbukas ang madamo nga oportunidad nga trabaho para sa mga Pilipino matapos ang state visit ni President Ferdinand ‘Bongbong’ Marcos Jr. sa Singapore.
Sa pakig-angut sang Bombo Radyo kay Engr. Rico Gadian, Bombo International Correspondent sa Singapore ginsiling sini nga nagpirma si Department of Migrant Workers Secretary Susan Ople sang Memorandum of Agreement (MOA) kaupod ang Ministry of Health nga maga-employ ang pungsod sang madamo nga mga health workers bangud sa maayo nga performance sa pagtrabaho nga ginapakita sang mga Pinoy.
Suno diri, maluwas sa health workers, nagahulat man ang trabaho para sa mga technical field kag skilled workers.
Ginsiling ni Gadian, nga maayo man ang pagtratar sang gobyerno sang Singapore sa ila nga mga OFW’s kag nagalaum nga mailog ini sang Pilipinas.
Ginkalipay man sang Filipino community ang pakigkita ni President Marcos sa ila kag nahinalaan ang plano nga amat-amat nga pagbuhi sa ekonomiya sang Pilipinas kag handum sini nga mabalik ang mga Pinoy sa pungsod.
Nagahinyo naman si Gadian sa gobyerno, nga ibalik sa Dominggo ang pag-operate sang PH Embassy sa Singapore bangud ini lamang ang adlaw nga bakante ang mga pilipino workers.
Nagapanawagan man ini nga suportahan sang mga Pilipino si President Marcos sa iya liderato bangud makit-an suno diri ang pagtimakas ni PBBM nga mabuhi liwat ang ekonomiya sang Pilipinas kag makahatag sang paglaum sa mga Pinoy.
