Isa ka makahalanusbo nga panghitabo ang nagluntad sa Sitio Riles, Barangay Lanot, Roxas City, matapos nasapwan nga wala na sang kabuhi kag duguon ang mag-iloy sa sulod sang ila puluy-an, subong nga adlaw sang Miyerkules sang kaaganhon.
Ginkilala ang mga biktima nga sanday Elma Perla 72-anyos kag ang anak sini nga si Ruby Jean Perla, 35-anyos nga nagatrabaho bilang virtual assistant.
Suno kay Roselyn Padio, kalapit balay sang mga biktima sang ma-interview sang Bombo Radyo, nabatian niya ang hibi sang 8 ka tuig nga bata sa sulod sang balay nga nagasinggit nga “Wawa is going to the hospital. Open the door.”
Rason nga gindoorbell nila ini sang madamu nga beses apang wala sang may nagasabat.
Bangud sa panghitabo, ginpilit sang mga kaingod balay nga buksan ang gate kag natukiban nga wala naka-lock ang pwertahan sang kusina.
Sang ila na ini nga ginsulod, ila nakit-an ang wala na sang kabuhi nga lawas sang tigulang nga iloy kag nagapaligo na sang iya kaugalingon nga dugo.
Ulihi nga nakit-an ang bangkay sang anak nga babayi sa sala, nga duguon man.
Natukiban man ang naglalapta nga mga pagkabutang sang mga biktima nga nagtulod sa mga espekulasyon sa posible nga pag-atake.
Dugang pa nga ginpahayag sang isa ka pumuluyo sa lugar nga nakabati ini sang kinagamo sa sulod sang puluy-an antes paman ang panghitabo, kalakip na ang paghibi sang mabaskog nga tunog apang wala nila ini ginsapak bangud nagapati sila nga normal na lamang ini nga away sang mag-iloy.
Base man sa nangin imbestigasyon sang mga kapulisan sa nagluntad nga krimen, wala sila sang nakita nga senyales sang pilit nga pagsulod sa puluy-an, wala man sang armas luthang nga narekober sa lugar.
Mahibaluan nga si Ruby Jean ang aga na nga napauli sa ila puluy-an nagikan sa iya nga trabaho antes paman nagluntad ang krimen.
Sa karon, padayon pa ang imbestigasyon sang mga otoridad agud mahibaluan ang motibo kag makilala ang mga suspetsado sa likod sang makangilidlis nga kamatayon.
