ROXAS CITY – Patay ang mag-iloy matapos ma-trap sa nasunog nga ginarentahan nga balay sa Purok 1, Barangay Libas, Roxas City.
Nakita ang bangkay sang mag-iloy nga sanday Josefa Progio kag Grade 6 pupil nga anak nga si “Alyas Charlotte” sa sulod sang CR nga nagakup-anay.
Ginapatihan nga na-suffocate ang mga biktima kag wala na nakaguwa sa balay bangud sa madamol nga aso nga gikan sa nasunog nga balay.
Sa exclusive interview sang Bombo Radyo Roxas kay Melvin Solis, bana sang biktima kag amay sang menor de edad nga bata nga nakabugtaw na lamang sila nga daku na ang kalayo rason nga gilayon sini nga ginbuksan ang pirtahan kag ginpaguwa ang tatlo ka mga anak nga gilayon gindala sa ospital bangud sa naangkon nga mga paso sa kalawasan.
Balikan kuntani ni Melvin ang asawa kag ang nabilin nga anak apang hinali nga nagsarado ang pirtahan kag mas nagdaku pa ang kalayo.
Sa imbestigasyon sang Bureau of Fire Protection nagaguwa nga nagsugod ang kalayo sa ginahimuan sang smoked fish nga kaingud lamang sang balay sang pamilya Solis.
