ROXAS CITY – Ang pagkamahuyugon sa paglagaw sa nanari-sari nga mga lugar ang nagtulod sa isa ka mag-tiyo agud mangin freelance drone pilots.
Ang mag-tiyo nga Glen kag Vic Mark Andalecio ang yara sa likod sang videos sa pila ka mga lugar sa Capiz kapareho sang ‘The Little Baguio’ sa banwa sang Maayon; ‘The Ruins of Alcatraz’ sa Barangay Culasi, Roxas City; Sta. Monica Parich Church sa banwa sang Panay; Cabug-Cabug Eco-Park sa banwa sang President Roxas; Basiao Beach sa banwa sang Ivisan; Agtalin Shrine sa banwa sang Pilar; Sacred Heart of Jesus sa Barangay Dinginan, Roxas City; Marugo Lake sa banwa sang Tapaz; Meditation Hills sa banwa sang Sapian; Public Plaza sa banwa sang Mambusao kag madamo nga iban pa.
Sa interview sang Bombo Radyo, ginpahayag ni Vic Mark, isa ka hotelier sa isla sang Boracay, nga pareho sila sang iya tiyo nga si Glen, isa ka seafarer, nga mahilig magpadulong sa nanari-sari nga mga lugar.
Bangud diri, nadumduman ni Glen nga magbakal sang drone agud ila matun-an kag makatipon sila sang mga ‘memories’ pinaagi sa mga videos.
Ginpahayag pa sini nga nangin maid-id man ang ila nga pagtuon sa paggamit sang drone kag editing agud makahuman sang maayo nga kalidad sang videos.
Samtang suno naman kay Glen, wala niya ginalauman nga makatipon sang madamo nga likes, shares kag views ang ila mga videos.
Tuman ang iya kalipay bangud ang ila sadto anay ‘hobby’ lamang sang iya hinablos nga si Mark, nakaangkon sang positibo nga mga komento gikan sa mga tawo nga nakakita sang ila videos.
Tinguhaan man nila nga antes sila magalagaw sa nagkalain-lain nga lugar sa Pilipinas, ila anay libuton ang magkatuhay nga mga tourist destinations nga mapabugal sang probinsiya sang Capiz.
Mahimo makit-an ang nanari-sari nga videos sang mag-tiyo sa ila Facebook page kag Youtube channel nga Andalecio Drone Media.
