ROXAS CITY – Pilason ang mag-utod matapos ginkastigo sang tatlo ka mga kalalakinhan sa Barangay Punta Tabuc, Roxas City.
Ginkilala ang mga biktima nga sanday Glen Pactao, 34 anyos kag Richard Pactao, 35 anyos sang Barangay Taslan, Dumarao apang temporaryo nga naga-estar sa Barangay Punta Tabuc.
Base sa nakuha nga impormasyon sang Bombo Radyo, nagpadulong sa tiyangge ang mga biktima agud magbakal sang plastic sang ginpalapitan ang mga ini sang mga suspek nga sanday Gilbert Batuigas, 25 anyos; Melchor Villa, 24 anyos; kag Daniel Manioto, 24 anyos, lunsay residente sang nasambit man nga barangay.
Diri na kag ginaalegar ginpulihan sang kastigo sang tatlo ka mga suspek ang mag-utod.
Gilayon naman nga ginrespondihan sang mga opisyales sang barangay ang nasambit nga insidente rason nga naaresto ang mga suspetsado.
Ginpanugyanan naman ang mag-utod nga biktima nga magpaidalom sa medical examination.
