ROXAS CITY – Ginhilway na sa karsel sang Pilar Municipal Police Station ang 45-anyos nga suspek nga ginaalegar naglabo sa iya manghod sa Barangay Tabun-acan, Pilar, Capiz.
Ini matapos nga nag file na sang affidavit of non interest ang pamilya sang biktima batuk sa suspek.
Ginkilala ang biktima nga si Ernesto Baltar kag residente man sang nasambit nga lugar.
Sandig sa nangin imbestigasyon ni Police Corporal Jaypee Tomogda, imbestigador sang Pilar Municipal Police Station, nagainom-inom ang biktima kaupod ang magulang sini nga si Edelberto Baltar, 45 anyos sang hinali nga nagpatunga ang mainit nga diskusyon sa nasambit nga mga persona kabangdanan nga nagkuha sang bolo ang suspek kag hinali nga ginlabo ang biktima sa nawala nga porsyon sang abaga.
Madasig nga gindala ang biktima sa Bailan District Hospital apang gilayon nga ginsaylo sa RMPH para madapatan sang dugang nga pagbulong.
