ROXAS CITY – Ginpatpat sang Department of Health – Capiz ang mga sakit nga posible makuha sa karon nga tuman ka init sang tiyempo bangud sa summer season.
Sa interview sang Bombo Radyo kay Mr. Joeffrey Espiritu, tagpamaba sang DOH-Capiz, ginpahayag sini nga bangud nagsugod na ang tag-ilinit sa pungsod, posible nga maguwa man ang mga sakit nga ginatawag ‘6S kag 1H.’
Ini nga mga sakit ang mga masunod:
S-kin diseases
S-ore eyes
S-ipon at ubo
S-uka at pagdudumi
S-akmal – (animal bite)
S-akuna at digrasya
H-eat Stroke
Sa bahin sang Skin diseases, may yara sang nagkalain-lain nga balatian ang mabatyagan kaangay nalang sang sunborn, bungang araw, habas kag uyapos, panugyan sang DOH nga likawan nga palhitan sang bisan ano nga sahi sang lana ang ‘open wound’ agud malayo sa impeksyon.
Ginapahanumdom man ang publiko nga indi magbulad sa init ilabi na sumugod alas-10 sa aga tubtob alas-2 sa hapon, bangud ini nga inoras ang makatuga sang tuman ka sakit sa panit, bangud sa init sang adlaw.
Likawan man ang pagsuksok sang tuman ka pikit nga bayo, kag kun mahimo magsuksok sang mga mahan-han nga ‘light color’ nga panapton.
Importante man nga mag-inom sang walo ka baso sang tubig ukon masobra pa, sa isa ka adlaw, masami nga mag-hugas sang kamot antes kag pagkatapos magkaon ukon maghampang sang mga hinuptan nga kasapatan.
Indi man pagtugutan nga magmaneho sang salakyan kun nakainom sang makahulubog nga ilimnon.
Nagalaum ang ahensya nga mangin masadya kag malayo sa sakit ang gina-eksperyensiyahan sa karon nga tag-ilinit.
