Roxas City – Nagsabat na ang Maintenance and Construction division head sang Capiz 1st Engineering District sang Department of Public Works and Highways (DPWH) matapos nga ginaalegar ginpahog sang isa ka anay City Administrator ang isa ka engineer sa Barangay Balijuagan, Roxas City.
Sa interview sang Bombo Radyo kay Engr. Julius Abela ginpahayag sini nga nagsumiter na ang contactor sang report sa DPWH Regional Office matapos nga ginpahog ni Gilbert Tan si Engr. Arwin Himor sang Brgy. Dayao sining siyudad.
Ginpahayag ni Abela nga nagpadala sila sang notisya kay pamilya Tan apang posible nga wala sila nag-intiendihanay.
Nahibaluan nga tuig 2018 nagpalab-ot ang DPWH sang expropriation case sa korte kag ginpaboran ini pinaagi sa pagpaguwa sang writ of possession sang tuig 2019.
Matandaan nga nagreklamo sa Roxas City PNP si Himor matapos nga ginaalegar ginpahog ini ni Tan nga patyon.
Ginaalegar nga naakig si Tan matapos nga naglapaw ang heavy equipment sang contractor sang International Builders Corporation sa iya nga propedad.
