Nagboto sang pabor ang mayorya sang mga mamalidha sa South Korea para sa mosyon sa impeachment ni President Yoon Suk Yeol kahapon nga adlaw sang Sabado, Disyembre 14.
Gin-anunsiyo ni National Assembly Speaker Woo Won-shik nga gikan sa 300 nga mamalidha, 204 ang nagboto sang pabor, 85 ang indi pabor, tatlo ang nag-abstain samtang may pito nga invalid votes.
Bangud lapaw pa sa kinahanglanon nga 200 ang numero sang mga mamalidha nga nagboto sang pabor para mapasar ang mosyon para sa impeachment, gindeklarar sang Speaker nga pasado na ang impeachment vote kag gintapos ang session.
Samtang, subong nga pasado na ang impeachment motion para kay Yoon, yara na sa kamot sang constitutional court agud desisyunan ang impeachment ni Yoon sa sulod sang anom ka bulan.
Suno kay Speaker Woo, nakatalana nga suspendiron ang presidential powers kag duties ni Yoon sa oras nga mabaton na niya ang kopiya sang dokumento sa impeachment kag kun nabaton naman ini sang Constitutional Court.
Samtang suspendido si Yoon, si Prime Minister Han Duck-soo ang magabulos anay sa iya bilang acting president.
Apang apisar nga suspendido ang gahom ni Yoon bilang presidente, magapabilin ini gihapon sa opisina kag indi makakas tubtob sa magdesisyon na ang Constitutional Court kun paboran sini ang iya impeachment.
Samtang, nagsaulog naman ang mga protester nga yara sa guwa sang parliyamento. Samtang nagpangibabaw naman ang kalinong sa mga pro-Yoon rally ukon tagasuporta sang presidente sa Gwanghamun square. Pila man ang wala malikawan nga magpangakig sa nangin desisyon sang mga mamalidha.
