Ginpasalig sang Malacañang ang stability sang gobyerno sa tunga sang nagapadayon nga mga isyu may kaangtanan sa ikaayong lawas ni President Ferdinand Marcos Jr kag sa impeachment proceedings.
Suno kay Palace Press Officer Undersecretary Claire Castro, nagapabilin nga aktibo ang Presidente sa iya nga trabaho apisar sa mga panugyan sang iya nga doktor nga maghagan-hagan lang.
Dugang pa ni Castro, wala nagabakasyon ang Presidente kag padayon nga nagabasa sang mga report kag importante nga mga dokumento agud mangin updated sa mga bagay-bagay sang gobyerno.
Pahayag pa ni Castro nga indi pareho si President Marcos sa iban nga bakasyon lang ang ginahunahuna.
Ginhatagan pagtamod ni Castro nga bisan pa nga kinahanglan sang Presidente ang pahuway, padayon ang iya trabaho nga pamatuod sang iya kahugod kag dedikasyon sa katungdanan.
Naghingyo man ang Malacañang sa publiko nga magsalig sa Presidente kag ginhatagan pagtamod nga importante ang iya padayon nga pagpamuno kag pagpangabudlay agud mapabilin ang kalig-on sang gobyerno kag may positibo nga epekto sa ekonomiya sang pungsod.
