Malinong kag matawhay na ang kahimtangan sa Qatar matapos ang missile attack nga ginlunsyar sang Iran sa US military base sa Al Udeid Airbase.
Sa interview sang Bombo Radyo kay Bombo Joseph Timothy Rivera, International Correspondent nga yara sa Qatar, ginpahayag sini nga bisan pa may mga pumuluyo nga nagpanic, wala sang malala nga halit nga natabo sa lugar. Isa lang ka missile ang naglupok, kag wala ini nakahatag sang daku nga kahalitan.
Dugang pa sini nga ang Al Udeid Airbase ang nagaisahanon nga airbase sang Estados Unidos sa Qatar, kag amo ini ang pinakauna nga insidente nga ginbomba. Bisan wala sang nahalitan, ang insidente nagtuga sang kakugmat sa mga tawo, nga nagresulta sa madamo nga nagdesisyon magpauli ukon mag-impake sang ila mga gamit. Nagluntad man ang panic buying sang mga tawo, sa diin ginpasiguro nga ginpamakal ang tubig.
Nahibaluan nga sa pihak sang sitwasyon, wala na sang klase sa mga eskwelahan kag madamo nga mga empleyado ang wala nagduty sa trabaho.
Samtang, ang mga pumuluyo sa Qatar, bisan may tensyon sa international nga lebel, nagapangabay na nga mabalik sa normal nga ila nga paghulag bangud suno kay Rivera, 12 na ka adlaw ang nagligad, kag gusto na gid sang mga tawo nga makabalik sa ila adlaw-adlaw nga pagpangabuhi.
Sa karon, ang mga tawo sa Qatar nagalaum nga matapos na ang krisis kag mabalik sa kalinong ang sitwasyon, kag bisan pa sa mga nagaluntad nga tensyon, nagapadayon ang pagmonitor sang mga otoridad sa pagsiguro sang kaluwasan sang pumuluyo.
