PANAY, CAPIZ – Pilason ang isa ka mamumugon matapos ginluthang sang isa ka hubog sa Barangay Linateran, Panay, Capiz.
Ginkilala ang biktima kay alyas “Jose”, 58-anyos samtang ang ginapahayag nga suspek amo si alyas “Ati” kag lunsay mga residente sang nasambit nga Barangay.
Base sa impormasyon nga nagikan sa Panay Municipal Police Station, ginapahayag nga yara sa impluwensya sang makahulubog nga ilimnon si alyas “Ati” kag wala untat ini nga nagasinggitan sa karsada rason nga nagguwa sa ila balay si alyas “Jose” agud palapitan kag sawayon ang nasambit nga suspek apang sang nagpalapit ang biktima hinali nalang ini nga ginluthang sang suspek sang wala matumod nga armas-luthang.
Bangud sini, nag-angkon sang pilas sa tiyan kag wala nga braso ang biktima nga gilayon naman nga gindala sa Roxas Memorial Provincial Hospital agud mapadapatan sang nagakaigo nga pagbulong.
Gilayon man nga ginrespondehan kag gin-aresto sang mga kapulisan ang suspek apang wala na marekober ang armas nga gingagamit sa pagpangluthang.
Sa karon, yara na sa kustodiya sang Panay PNP ang suspetsado para sa nagakaigo nga disposisyon.
