ROXAS CITY – Gin-utas sang kaugalingon nga magulang ang kabuhi sang iya manghod matapos ginapahayag ginlabo sa Sitio Sapa, Barangay Adlawan, Roxas City.
Ginkilala ang biktima nga si Gregorio Capote 43-anyos, laborer samtang ang ginatudlo suspek nga magulang sini ang ginkilala kay Jerry Capote 47-anyos, tricycle driver kag lunsay residente sang nasambit nga lugar.
Sa impormasyon nga nakuha sang Bombo Radyo nagikan sa Roxas City Police Station, ginapahayag nga sang nagluntad ang insidente naga-inum-inum ang biktima kaupod ang mga abyan sini sang hinali lamang nga nag-abot ang suspek nga yara man sa impluwensya sang makahulubog nga ilimnon kag ginpalapitan sini ang biktima kag gin-akigan.
Bangud sa natabo, nangin mainit ang pagbinaisay sang biktima kag suspek kung sa diin didto na kag may natabo nga komosyon kag wala sang pagpangduha-duha ginlabo sang suspek ang biktima.
Nag-angkon sang patal nga pilas ang biktima sa iya tyan, tiil kag magkatuhay nga parte sang iya lawas.
Sa karun yara na ang bangkay sang biktima sa isa ka punerarya sining syudad kag natalana nga ipaidalum sa post-mortem examination.
Samtang ang suspek naman yara na sa kustodiya sang Roxas City Police Station, para sa nagakaigo nga disposisyon.
