CUARTERO, CAPIZ – Pilason ang isa ka mangunguma matapos ginlabo sa Sitio Hanalon, Barangay Malagab-i, Cuartero, Capiz.
Ang biktima amo si alyas Dan, 45-anyos, wala sang asawa samtang ang suspek amo si alyas Chris, 35-anyos kag lunsay nga mga residente sang nasambit nga lugar.
Sa impormasyon nga nagikan sa Cuartero Municipal Police Station, natabo ang insidente las 8:40 kahapon sang aga Mayo 25, 2025 kag base sa panaysayon sang suspek sa kapulisan, ginpahayag nga nagpadulong ang biktima sa compound ni Barangay Kagawad Gina Gumban kun sa diin nagatinir ang suspek nga si alyas Chris kag nagbuya ang biktima sang malain nga mga tinaga.
Suno pa diri nga may dala ang biktima nga binangon kag ginbutang niya ini sa atubang sang gate apang ginhaboy ini sang suspek sa kilid sang karsada kag ginhambalan ang biktima nga magpauli.
Nagkuha ang biktima sang bato kag ginhaboy sang bato ang JBL speaker nga ara sa sulod sang compound kag gilayon nga naglakat apang ginlagas ini sang suspek kag ginlabo ini sang katana nga naigo sa tuo nga kamot.
Gilayon nga gindala ang biktima sa Senator Gerardo M. Roxas Memorial Hospital sa banwa sang Dao para sa pagbulong.
Sa karon, yara na sa kustodiya sang Cuartero PNP ang suspek kag ginsungka man sini sa kapulisan ang gingamit nga katana nga may kalabaon nga 40.5 pulgada.
Natalana naman ini nga pasakaan sang nagakaigo nga kaso.
