ROXAS CITY – Ginreklamo sang isa ka manugbaligya sang uga sang Tulay Ugahan sa Barangay Banica, Roxas City ang natabo nga pagpangawat sang iya mga baligya sang wala matumod nga kawatan sa nasambit nga lugar.
Suno kay Eugene Benaranda, samtang nagahilay-hilay ini sa iya nga pwesto, nag-abot ang isa ka motorsiklo sakay ang wala makilala nga lalaki nga sa iya paghangop magabakal lamang sang uga.
Nag-inom ini sang makadali sang tubig apang sa iya kakibot, nakit-an sini nga ginkarga sang kawatan ang masobra 10 ka kilo sang mga uga sa iya motorsiklo kag nagpaburhot sang palagyo.
Ginpahayag sini nga nagabalor sang kapin P3, 000 ang mga uga nga gintaban sang wala matumod nga kawatan.
Aminado man ini nga dako nga kapierdihan sa iya negosyo ang ginkawat sang nasambit nga suspek.
