ROXAS CITY – Nag-angkon sang pilas sa magkatuhay nga parte sang lawas ang isa ka mununudlo matapos nga naaksidente ang ginasakyan sini nga motorsiklo sa Sitio Talaytay, Barangay Nagba, Cuartero, Capiz.
Ginkilala ang biktima kay Maria Mae Barnuevo, 31-anyos residente sang Barangay Angub, sang amu man nga banwa, kag driver sang Suzuki Raider nagaduag pula.
Samtang, ang nakabunggo ang ginkilala kay Winston Gonzaga Ortaliz, 56-anyos isa ka Sales Agent kag residente sang Gold Crest Subd. Bata, Bacolod City, kag ginamaneho ang Toyota Innova SUV.
Sandig sa inisyal nga imbestigasyon sang mga katapo sang Cuartero Municipal Police Station, samtang ginasubay sang biktima ang dalanon padulong sa banwa sang Cuartero, sang hinali na lamang ini nga ginbungguan sang nagasunod nga salakyan.
Ginpahayag sang suspek nga nadulaan ini sang kontrol rason nga nabungguan niya ang nauna nga motorsiklo.
Madasig naman nga nagresponde ang mga katapo sang Cuartero Emergency Response Team (CERT) kag ginpangdapatan sang pauna nga pagbulong ang nagkalapilasan.
Ginkustodiya naman sa Cuartero Municipal Police Station ang duha ka mga salakyan para sa nagakaigo nga disposisyon.
