PONTEVEDRA, CAPIZ- Patay ang isa ka lalaki matapos nga nadisgrasya sa ginamaneho nga motosiklo sa karsadahon sang Barangay Tacas, Pontevedra, Capiz.
Ang biktima amo si Mart Kelvin Banga, 34-anyos, maestro sa CAPSU-Pontevedra kag residente sang Barangay Bailan, Pontevedra, Capiz.
Sa impormasyon nga nakuha sang Bombo Radyo nagikan sa Pontevedra Municipal Police Station, ginapahayag nga samtang ginasubay sang amo nga biktima ang nasambit nga karsadahon, hinali nalang ini nga nadanlog kag natumba ang ginamaneho nga motorsiklo.
Bangud sa makusog nga impact sang pagkatumba, nag-angkon sang nagkalain-lain nga mga pilas sa magkatuhay nga parte sang lawas ang biktima nga gilayon naman ginpadangat sa Bailan District Hospital sang mga katapo sang Pontevedra Emergency Response Team, apang gindeklara ini nga ‘dead on arrival’ sang doktor nga nag-atendir.
Sa subong, yara na sa isa ka punerarya sang nasambit nga banwa ang bangkay sang biktima.
