Masobra 400 ka mga benepisyaryo halin sa Transport Network Vehicle Service (TNVS) kag Transport Network Company (TNC) sectors ang nakabaton sang P5,000 Cash Relief Assistance sa probinsya sang Capiz.
Sa interview sang Bombo Radyo kay Katherine Joy Lamprea, Assistant Regional Director for Operations sang Department of Social Welfare and Development (DSWD), iya ginpahayag nga masobra 7,000 ang target beneficiaries sa bilog nga Western Visayas.
Nauna na nga naumpisahan ang distribution sang Mayo 26 sa Guimaras kag Aklan kag kahapon, Mayo 28 nag-umpisa naman sa Iloilo kag Capiz kag nagpadayon subong nga adlaw.
Suno kay Lamprea, ang payout activity ang kabahin sang padayon nga pagpanikasog sang gobyerno nga mahatagan gilayon sang financial assistance ang transport sector workers nga apektado sang economic challenges kag nagataas nga operational costs ilabi na sa mataas nga presyo sang gatong.
Nahibaluan nga ang Cash Relief Assistance ang direktiba ni President Ferdinand R. Marcos Jr. kag ni DSWD Secretary Rex Gatchalian agud mapabaskog ang social protection measures kag masiguro nga direkta nga nagalab-ot sa mga vulnerable sectors ang bulig sang gobyerno.
