Ginkumpirmar sang Armed Forces of the Philippines (AFP) nga naka-house arrest sa karon sa sulod sang kampo sang militar ang isa ka mataas nga opisyal sang Philippine Air Force nga gin-akusaran sang sexual assault sang iya sini duha ka mga junior officers nga nagaserbe bilang office assistants niya.
Ginpakasuhan ang senior official sa prosecutor’s office sang joint criminal complaint para sa rape pamaagi sang sexual assault kag attempted rape pamaagi man sa sexual assault.
Ini matapos man nga nakakita sang prima facie evidence sa ginkasa nga imbestigasyon kun sa diin nagapakita ang opisyal sang conduct unbecoming of an officer kag conduct prejudicial to good order and military discipline.
Gilayon naman ini nga ginsipa sa pwesto ang opisyal, matapos nga ginpasaka ang mga reklamo batuk sa iya.
Suno kay AFP Spokesperson Colonel Francel Margareth Padilla, naka-pending ang kaso para sa approval ni AFP Chief of Staff General Romeo Brawner Jr. nga magaserbe bilang convening authority para sa General Court Martial proceedings.
Magaatubang ang high-ranking military official sa hearing sa idalom sang Articles of War 96 kag 97.
Gin-athang naman ni Colonel Padilla nga magapabilin sa kustodiya sang AFP ang ginaakusaran nga opisyal base sa Articles of War 75, kung sa diin nakasulat nga ang sin-o man nga indibidwal nga subject sa batas militar nga hawid sang mga military authorities para sa pagsabat ukon nagahulat sang trial ukon resulta sang trial ukon nagapaidalom sa sentensiya para sa krimen ukon ginasaliton sa sala nga nahimo sa idalom sang Articles of War, mahimo nga ipabilin sang AFP ang kustodiya, apisar nga may ara man sang hurisdiksyon ang civilian court.
Samtang, ginsiguro naman sang AFP official nga makig-kooperar ang militar kag magasunod sa ti-on nga mag-isyu ang korte sang warrant of arrest, commitment order ukon ano man nga legal nga direktiba batuk sa PAF official.
Ginalauman nga makumpleto ang proseso sa sulod sang anum ka bulan apang, posible ini nga mapalawig depende sa pagkakumplikado sang kaso, availability sang mga testigo kag mga mosyon nga ginapasaka sang may kaangtan nga mga partido.
