Padayon ang ginapatigayon nga imbestigasyon kaangut sang makahalangusbo nga pag-crash sang eroplano nga Air India sa Ahmedabad, kun sa diin indi magnubo sa 279 ka tawo ang napatay.
Sa interview sang Bombo Radyo kay Geraldine Borda, International Correspondent sang Bombo Radyo sa India, nakit-an na sang mga otoridad ang cockpit voice recorder—ang ikaduha nga “black box” sang Boeing 787 aircraft.
Una na nga narekober ang flight data recorder 28 oras antes ang insidente sang Huwebes.
Kadam-an sa mga biktima ang pasahero sang Flight AI171 nga padulong sa London Gatwick, apang wala nakalupad sang maayo kag nagtibusok sa building malapit sa airport pila ka minutos matapos ang takeoff.
Sandig sa una nga report sang mga otoridad, nakapadala pa sang mayday call ang kapitan sang eroplano nga si Captain Sumeet Sabharwal pila ka segundos matapos naglupad, antes dalayon nga nag-crash ang amo nga eroplano.
Wala pa sang ginpaguwa nga opisyal nga resulta sa imbestigasyon nga ginapangunahan sang mga opisyal sang India, kaupod ang mga eksperto gikan sa United Kingdom kag United States.
Nakatutok sa karon ang mga eksperto sa posible nga pagpalya sang makina, problema sa wing flaps, kag landing gear bilang rason sang isa sa mga pinakamalalala nga aksidente sa kasaysayan sang komersyal nga aviation.
Ginalauman nga makabulig ang mga ulihi nga pag-istoryahanay sang mga piloto sa cockpit voice recorder agud mahatagan sang kaathagan ang matuod nga rason sang trahedya.
