Nagpasalig sang bulig pinansyala ang alkalde sang banwa sang Ivisan sa nagluntad nga karambola sang mga salakyan matapos ini araduhon sang 10-wheeler truck.
Sa interview sang Bombo Radyo kay Mayor Felipe Neri Yap, ginpahayag sini nga indi magpabaya ang ila munisipyo sa paghatag sang bulig sa mga nagkalaulamid sa nasambit nga aksidente ilabi na ang ginbawian sang hulam nga kabuhi.
Pahayag pa sini nga pati ang hospital bill ang ila pagasabton kag kun indi man kaya sang ila nga munisipyo nagapasalig man ini nga yara ang gobyerno nga magasuporta kag magahatag sang ila nga bulig.
Suno pa kay Yap isa sa biktima ang ila empleyado nga ginbawian sang hulam nga kabuhi kag personal sini nga kilala, gani ginkasubo sini ang magkapatay sang amo nga biktima pati man sa mga iban pa nga nagkalaulamid.
Panugyan sini sa mga pumuluyo kag mga drivers nga nagapadulong kag naga-agi sa ila banwa nga maghalong sa pagmaneho.
