ROXAS CITY – Nagpaathag ang alkalde sang syudad angut sa kaundan sang Memorandum of Agreement (MOA) para sa emergency loan sang mga tricycle drivers sa syudad sang Roxas nga tuman nga apektado sang pandemya kag libre sakay sang mga MPUJs.
Partikular nga gintumod ni Mayor Ronnie Dadivas kun sin-o ang sarang maka-avail sa P10,000 nga emergency loan nga iga-finance sang Hublag Capiznon.
Ginpahayag ni Mayor Dadivas ang maka-avail sini amo ang mga tricycle drivers nga naga-boundary sang tricycle kag mga driver-operators sang tricycle.
Suno sa alkalde nga nadihon ini nga programa sa katuyuan nga mabuligan sang gobyerno sang syudad ang transport sector nga nagpalab-ot sang ila concern nga kun mahimo mahatagan sila sang ayuda.
Diri nagsulod ang Hublag Capiznon nga ginpresentar ang ila proposal sa pag-utang sang mga tricycle drivers.
Ginpahayag nga sarang mapa-utang sang Hublag ang mga tricycle drivers sang kantidad nga P10,000 sa diin ang Roxas City government ang magabayad sang interes kag ang kapital lamang ang bayaran sang mga drivers.
Apang ginklaro sang alkalde nga indi sila sa gobyerno sang syudad ang maga-determinar kun sin-o ang mangin kwalipikado nga tricycle drivers sa nasambit nga loan kundi ang Hublag Capiznon mismo.
Ginklaro pa sang opisyal nga indi man sarang mangin co-maker sang maga-loan nga drivers ang Roxas City government kundi ang TODA officer mismo.
Nahibaluan pa nga 3-4 ka bulan lamang ang terms of payment sa diin kun mapaslawan ang payee, ang co-maker sini ang magabayad.
Kumpyansa ini nga magabayad ang tricycle driver nga maka-avail sang emergency loan, bangud ipa-intiende man sa ila antes sila maka-loan ang ila responsibilidad kag ang madangatan sang ila co-maker nga magaabaga sang ila ginbilin nga liabilidad.
